KUUENEGINNEDAAG THOEAR 2011

Uuever drie maondj is ’t zoeawied
vuuer ‘n eurke in de hoofrol
woeane wae twieë daag in ’t protocol
en zeen wae oze luip hie kwiet

Wie ‘n kindj zien leefste spuuelgood
pakke zie ós Thoear den aaf
en kónne es toerist braaf
kieke nao de kuuenegin en häöre noewe hood

Mer ieës mós se zeen gescreendj
anges moogs se dien eige koeaj neet in
en det is nog mer ’t begin
want dao geit hieël get gebuuere… sjient

De gemeindje bekaltj noe al ‘n poeas
waat angerdaag allemaol mót wieke
of es völling vuuer decor zal blieke
en geuftj ós ’n segaar oet eige doeas

Thoear weurtj aafgezatte, struimtj boemvol
bösse zulle op en aaf gaon rieje
krek wie vreuger tieje
in de Mieërs, mèt die van Rol*

Wie in ‘n sjilderie van Breughel
versjiene strakkes de vraemste veugel
en zuus se reporters renne
mèt häör radio-antenne

Keie zulle waere opgehoealdj
en oppernoew gelag
haet ’t ouch get blieves gebrach
det wae häör höbbe ingehoealdj

Mèt mien vlekske inne handj
staon ich aevegood aan de kantj
want ’t is ’n groeate ieër

(en ich hoeap
det zie ’n bótram mèt sjroeap
lösj, die ich nog vuuer häör smieër)