THOEARDER GOUD               

In de wingerd langs de Napoleonswaeg
hings se te wachte toet de herfs
van dien riepe wange dröptj
en door vuuerzichtige vingers weurs geplöktj
oh Auxerrois

in kupe gegoeadj
oetgepersj
es gevange zónleech opgesloeate in dónkel vate
vol geheime hèls se diene wintjerslaop

óm in ’t vuuerjaor te versjiene
es laevendj gedich in gleujendje glazer
róndj te gaon bie ein good gesprek
tösse vrinj aan de gedèkdje taofel