PEKSKESAOVENDJ

Saoterdigs zat moder al de kieëtel op
den roeak de ganse kuueke nao sóndigse sop
Aerpel hoeale oet de kelder en vas sjèlle
hoofdje sóndigs nog mer de kermenaaj in ’t kèlle
Vader tupdje den vol gojen aard
vese buuenkes oet de gaard
’n Suiske mèt get champignons d’rbie
och, waat waas oos moder blie

En roeak ‘t nao zelfgebakke flaje
kóste wae ós dao duchtig aan begaje
Die op te aete waas gein kuns
zoea beweze wae häör ‘n groeate guns

Mer allewiel mót drek die aafzuugkap aan
want waem wiltj noe nog dae zwaam
van veesgekoeakdje spruutjes
det geuftj mer aanslaag op de kuuekeduuerruutjes
Ze kónne mich nog mieë vertèlle…
höb geine zin óm ore staon te reure in det kèlle

Ich bèn toch neet gans snik…
verwerm de sop waal oet ‘t blik
koeak de boeane oet ’n pekske
braoj get krieltjes oet zoea’n zekske
kipfileetje vuuergesneje
klaor d’r mèt… ederein tevreje

Zoea vere wae noe pekskesaovendj mèt gistextract, aroma’s, maltodextrine,
gemodificeerdj zètmael, anti-oxidant, kleurstof, smaakversterker en anger vitamine
Want wae höbbe op oos pekskes staon
waat Sinterklaos d’r allemaol haet in gedaon

Kiek, zoea maaktj dae mich niks mieë wies
al haet det waal ziene pries
Want wèts se waat…
’t is allemaol eine pot naat
Gaef mich mer zoormoos mèt ’n paar spekskes
den det aete oet die pekskes       

Minse, ich sjei mer oet mèt klage
gae mótj thoes al genóg verdrage
en wins uch alvas vuuer kómmendj jaor
’n smakelik Noewjaor