OOS TAAL

Kómtj, laot ós aansjuve aan de taofel van oos Thoearder taal
en preuve van de wuuerd die moder klaorgemaaktj haet
wuuerd zoea zeut wie riesteflaaj
hertelik wie zelfgetrokke sóndigse sop
of mechtig wie kesekook

Kómtj, laot ós wuuerd gaeje in de gaard van vader
wuuerd die gaon wie ges
gelp wie graas
of sjuuet goeaje wie aerpel

Kómtj, laot ós sjrieve mèt wuuerd
zoea zaoch wie vese snieë
kuuesper wie iesblome op de vinsterroet
of gezwank wie ’n wits

Laot ós ouch woeane in ’t hoes van wuuerd
gerumpeldj wie de henj van groeatvader en groeatmoder
wuuerd die battere wie ein voes
staeke wie ’n däörehèk
stief zeen wie ’ne badding
mer nog spettere wie veurpiele mèt Noewjaor