DE ALDI 

Es jungske ging ich óm eine paeperkook
nao Kläörke naeve mich op de hook
De waekelikse waar kós in eine kalebas
en blie heel ich mien babbeltje vas
Woeare ins de cente op
sjreef me ’t gewuuen in ’t beukske op
Noe staon ich mèt ‘n vol ker in de rie
te pinne aan de kassa van de Aldi

De slechters haje häör vaste klantje
Sjang Göbbels, Staor of Sjang van Jantje
Jeanne van Berb verkoch dich óngergood
en de dames Sjippers eine noewe hood
Lökdje dich eine bandj plekke zelf neet
hólp dich Tjeuke Metten, Harieke Nouwen of Maan van de Smeed
Jan, Sjeng en Soeake lapdje dich de sjoon
Det zeen ich de Aldi nog neet doon

Bie de boerebóndj kreegs se witkalk en ouch ter
Mil de mèlkboer voor róndj mèt paerd en ker
Aad reej mèt ziene SRV
En Marius haaj de VéGé
Op de Wingerd waas de Coöperatie
En op de Boeajestraot beek bekker Nie
Noe kónne wae nao de Akker haer
Want de Aldi boewdje dao zoea gaer

Jao, ich mis nog dèk
de ruuek van veesgebakke wèk
of sóndigs wanjele nao de kepel
en bie ’t kräömke van Kruimeltje den eine kermel
Mer det is allemaol nostalgie
die tieje zeen vuuergood vuuerbie
Mer soms waer ich waal ins get sjoew
Want waem duit strak de duuer weer toew?

Weg… Klimop, Hima en de Kroon
Wae ginge de boeadsjappe bie Jan Linders doon
of völdje saoterdigs oos kerke
bie die anger groeate merke
en pleegdje zoea zelf euthanasie
En noe lachtj de Aldi blie